Цареви Кули, Струмица

Археолошките ископувања на локалитетот Цареви Кули во текот на 2009 година беа спроведени на повеќе пунктови со цел да се доистражат културните хоризонти на југоисточното и централното плато, потоа на дел од северозападното плато и дел од некрополата во секторот Јужен рид. Овојпат акцентот беше на истражувањето на објектите и содржините, како од средновековниот, така и од рановизантискиот, доцноантичкиот, римскиот, македонско-хеленистичкиот, античкиот класичен и праисторискиот период (средна бронза и ран енеолит). Се истражи простор во вкупна површина од 3654 м². Покрај мноштвото средновековни објекти, се појавија и остатоци од објекти од римскиот и доцноантичкиот период. Се истражи дел од протегањето на југоисточниот антички бедем и одбранбените кули, а посебно се значајни четирите јами со големи димензии кои дадоа непроценлив материјал од V-IV век пр.н.е. и кои во голема мера го збогатија сознанието за класичниот антички период на овие простори.

Се истражуваше и дел од некрополата во секторот Јужен рид каде се доби богат фундус на движни наоди, кои сведочат за социјалниот статус и културните достигнувања на популациите кои ја населувале Струмица во текот на македонско-хеленистичкиот, доцноантичкиот, рановизантискиот и средновековниот период.

Еден од поинтересните наоди е секако и пронаоѓањето на депо со 4300 средновековни монети од втората половина на XII и првата половина на XIII век, време кое има силни одрази во историјата на Цареви Кули. Беа пронајдени повеќе од 1600 предмети кои речовито го илустрираат животот и културата на Цареви Кули. Дел од овие наоди најдоа свое место и на оваа изложба.

Дел од наодите може да ги погледнете овде.